Stqarrija għall-Istampa tal-Kumitat Ewropew tar-Reġjuni

Il-Kumitat Ewropew tar-Reġjuni u l-EUROCHAMBRES jingħaqdu biex iwasslu impjiegi u tkabbir madwar l-UE

Il-Kumitat tar-Reġjuni (KtR) tal-UE u l-Assoċjazzjoni tal-Kmamar tal-Kummerċ u l-Industrija Ewropej – EUROCHAMBRES – qablu dwar Pjan ta’ Azzjoni ġdid għal kooperazzjoni mġedda f’oqsma ewlenin għat-titjib tal-kundizzjonijiet tan-negozju u l-iżvilupp ekonomiku reġjonali.

Il-Pjan ta' Azzjoni, iffirmat flimkien fi Brussell mill-Presidenti Karl-Heinz Lambertz (Kumitat Ewropew tar-Reġjuni) u Christoph Leitl (EUROCHAMBRES), jistabbilixxi oqsma ta' kooperazzjoni għall-2019-2022 bil-għan li jiġu indirizzati l-qgħad fost iż-żgħażagħ u n-nuqqas ta' tqabbil tal-ħiliet, jiġi stimulat l-intraprenditorija, tissaħħaħ il-koeżjoni u tiżdied il-kompetittività industrijali.

 

Meta ffirma l-Pjan ta' Azzjoni, Christoph Leitl, President tal-EUROCHAMBRES, ikkummenta: “L-EUROCHAMBRES u l-Kumitat Ewropew tar-Reġjuni huma b'saħħithom daqs in-netwerks tagħhom. Il-Kmamar tal-Kummerċ u l-Industrija lokali u l-awtoritajiet reġjonali għandhom rwol ċentrali fit-twettiq tal-progress soċjoekonomiku tal-Ewropa fil-livell lokali. Dan se jissaħħaħ jekk in-netwerks tagħna jaħdmu flimkien. Il-Pjan ta' Azzjoni konġunt tagħna jipprovdi qafas siewi biex tissaħħaħ din il-kooperazzjoni u b'hekk titmexxa 'l quddiem it-tkabbir reġjonali u Ewropew.”

 

Il-President tal-KtR Karl-Heinz Lambertz żied jgħid: “Huwa biss permezz tal-kooperazzjoni, is-sħubija u l-ħidma lokali bejn il-fruntieri li l-UE tista’ toħloq impjiegi, issuq it-tkabbir, tindirizza l-inugwaljanza u tiżgura li l-ebda ċittadin ma jitħalla lura. Is-sħubija mġedda tagħna ma’ EUROCHAMBRES tgħaqqad in-negozji flimkien mal-awtoritajiet lokali u reġjonali minn madwar l-UE sabiex inkunu nistgħu naqsmu l-għarfien, l-esperjenza u l-ħiliet biex intejbu l-effettività tal-UE u nistimulaw l-investiment reġjonali.”

 

Il-Pjan ta' Azzjoni tal-KtR u l-EUROCHAMBRES 2019-22 jipprevedi l-oqsma ta' kooperazzjoni li ġejjin, li se jiġu riveduti regolarment matul il-perjodu ta' implimentazzjoni:

 

 

• Kooperazzjoni msaħħa dwar il-ħidma leġiżlattiva tal-UE permezz tal-iskambju ta' dokumenti ta' pożizzjoni u studji;
• L-indirizzar tal-qgħad fost iż-żgħażagħ u n-“nuqqas ta’ tqabbil tal-ħiliet” permezz tal-iskambju ta’ prattiki innovattivi u tal-aħjar prattiki;
• L-istimulazzjoni tal-intraprenditorija u l-politika tal-SMEs permezz tal-promozzjoni tal-programm Erasmus għal Intraprendituri Żgħażagħ (EYE) u n-netwerk tar-Reġjuni Intraprenditorjali Ewropej (EER);
• Tappoġġja regolamentazzjoni aħjar tal-UE u s-sussidjarjetà permezz ta' Valutazzjonijiet tal-Impatt Territorjali u l-inizjattiva taċ-Ċentri Reġjonali;
• Appoġġ għall-kooperazzjoni fil-pajjiżi tal-viċinat permezz ta' inizjattiva dwar l-intraprenditorija żagħżugħa fil-pajjiżi sħab tal-Mediterran u t-tixrid ta' informazzjoni dwar l-aċċess għall-finanzi għall-awtoritajiet lokali u reġjonali;
• Tisħiħ tal-politika ta’ koeżjoni tal-UE permezz tal-#AlleanzataKoeżjoni;
• It-tisħiħ tar-reżiljenza territorjali permezz ta' xogħol analitiku konġunt dwar l-impatt tar-relazzjonijiet kummerċjali futuri bejn l-UE27 u r-Renju Unit, fuq il-kompetittività industrijali reġjonali u fuq l-iżvilupp ekonomiku, soċjali u territorjali tal-gżejjer permezz tan-netwerk tal-Kmamar INSULEUR.